Evnisfrágreiðing 2005: Tøknilig menning og vælferð

Hví?

Sæð frá samfelagsligum sjónarmiði er endamálið við øllum búskaparligum virksemi størst møgulig búskaparlig vælferð hjá borgarunum. Besti háttur at økja búskaparligu vælferðina er at fáa í lag búskaparvøkstur. Ein skjótt vaksandi búskapur gevur sum frálíður ein ríkan búskap. Í einum ríkum búskapi hava fólk fleiri og betri valmøguleikar: fólk kunnu – bæði gjøgnum privatar og gjøgnum felags almennar avgerðir – velja at økja privatu nýtsluna, lækka skattirnar, økja um almennu útbúgvingarmøguleikarnar, verja umhvørvið betur osfr. Í heila tikið gerst lættari hjá einstaklingum og samfelagnum sum heild at røkka einhvørjum máli um økta vælferð.