Búskaparfrágreiðing 2002

Talan er ikki um nakra stórkreppu, elvda av okkum sjálvum, sum er á 
veg. Men um eina minking í vøxtri vegna altjóða konjunkturar og 
trekleikar í tillagingini.

Talan er partvíst um viðurskifti, vit onga ávirkan hava á – so sum 
útflutningsprísir og innflutningsprísir, rentustøði og annað, sum stavar 
frá búskapargongdini á heimsmarknaðunum. 

Útflutningsprísirnir – og nær tengt at teimum, avreiðingarprísirnir – 
eru falnir munandi hetta seinasta árið. Og hóast prísirnir á avgerandi 
fiskasløgum eru farnir nakað upp aftur seinastu tíðina, so er lítið at 
ivast í, at útflutningurin fer ikki framhaldandi at geva sama 
vaxtraríkast, sum árini frammanundan.

Tað er ikki víst, at útflutningurin verður so nógv minni enn árini 
frammanundan. Tað er heldur ikki víst, at býtislutfallið versnar so 
nógv í mun til undanfarin ár. Heldur sýnist tað at vera so, at tað íkastið 
til vøxtur, sum komið er úr útlendska eftirspurninginum og tessvegna 
útflutningsframleiðsluni, ikki fer at vara við.

Eftir nøkur ár við munandi vøxtri í útflutningsvirði og flestu avgerandi 
fiskaprísum, er altso talan um eitt skifti. Eitt skifti til eina tíð við 
ongum ella minni vaxtraríkasti frá útflutningsframleiðsluni. 
Væntandi er kortini enn vøxtur í framleiðsluni til heimamarknaðin. 
Hóast ongin vøxtur er í útflutningsinntøkunum, so er hópin av uppgávum innanlands, sum eftirspurningur er eftir at fáa loystar.

Eingin orsøk er til at vænta, at eftirpurningurin hjá húsarhaldinum fer 
at minka, og tí fer tann parturin av innlendsku tænastunum valla at 
merkja nakað serligt til bakkastið í útflutningsframleiðsluni. Henda 
meting er tó grundað á, at prísfallið í útflutninginum ikki verður meira 
enn tað longu er. At inntøkuvøxturin í samfelagnum sum heild higartil 
í ár hevur verið 11% týðir eisini uppá, at samfelagið sum heild ikki í 
serligan mun er merkt av minkingini í útflutningsprísunum.

Byggivinnan hevur eisini uppgávur at loysa, sum í stóran mun eru 
óheftar av bráðfeingis sveiggjunum í útflutningsprísum. Her er talan 
um bygningar og byggiverk til bæði vinnuna, tað almenna og 
húsarhaldið